“Білім негізі-бастауышта” дегендей, бүгін бірінші сыныптар арасында «Рахмет саған, Әліппе!» атты іс-шара өтті. Бұл күн – 1-сынып оқушылары үшін ерекше маңызды сәт. Олар алғаш рет қолдарына ұстап, оқуды үйренген Әліппемен қоштасып, өз жетістіктерін мақтанышпен көрсетті.
Іс-шара барысында оқушылар өз өнерлерін ортаға салып, ән айтып, өлең оқып, би биледі. Әліппеге алғыстарын білдіріп, алған білімдерін көрсетті. Сонымен қатар, жаңа достары – Ана тілі оқулығымен танысып, білім әлеміне әрі қарай саяхат жасауға дайын екендерін білдірді.
Бұл күн оқушылардың ғана емес, олардың ата-аналары мен ұстаздары үшін де үлкен қуаныш. Әліппемен қоштасу – білім жолындағы алғашқы маңызды қадам. Балалардың білімге деген құштарлығын, өнерлерін көріп, ата-аналары оларға қолдау көрсетіп, ұстаздары олардың жетістіктеріне мақтанышпен қарады.
Енді оқушыларымызды қызықты жаңа пәндер, терең білім мен жарқын болашақ күтуде. Барша 1-сынып оқушыларын осы жетістіктерімен құттықтай отырып, оқуда озат, алда болатын белестерді бағындыратын білімді ұрпақ болуларына тілек білдіреміз!
.jpg)
-.jpg)
